「野玫瑰之戀」完場後，大會設咗分享會，咁節錄咗當中嘅內容，俾無睇呢一場嘅朋友重溫番。
1. 演譯梁漢華呢個角色有無咩同大家分享？
高皓正答：
都真係好大挑戰。因為呢個角色真係有好多唔同層面嘅，咁佢由官仔骨骨教書，去到佢因為感情破壞咗本來有嘅婚姻，跟住到喪心病狂犯殺人罪嘅地步。咁我同漢華好唔同，我全部都未試過，有未婚妻又同個紅歌星一齊，癲咗啦總之就。所以掌握時需要花好多功夫，有好多嘢唔可以用我嘅經驗去配合劇情，好多嘢要去學去諗。我喺嗰段時間都不斷睇好多書去發展個腦點去諗，用我以前僅有一啲經驗去代入呢個角色。例如：我有一啲發嬲場面，其實以往我都會有呢啲情況嘅，可能未至於殺人，但我自己做嘅時候好享受，因為可以發揮以往一啲經歷。
2. 電影版同舞台劇版個結局雖然思嘉都是死去，但電影版漢華會知道個真相，而舞台劇係唔知道。咁到底個係無show俾觀眾睇定真係改咗？
編劇鍾燕詩答：
係特登改個故局，因為原著係寫於60年代初，以前個故事係一來漢華知道自己做錯事殺咗一個善良嘅女人，二來係要俾觀眾睇番成件事，原來嘉思唔係水性楊花，而係為咗保護自己心愛嘅人。我覺得依家劇場嘅觀眾太聰明了，要顧及番佢地，而唔需要畫公仔畫出腸，所以就未必有需要交待得太仔細，可以留番個空間俾觀眾思考，例如：如果漢華知道真相會有咩反應呢？或者講唔埋佢一世都唔知呢？等等…
焦媛答：
另外我都想補充少少，其實我哋唔係話淨係想講究竟漢華知唔知思嘉為咗佢定係點樣，而係根本上講緊愛情，我地個標題都係講世界最脆弱嘅野。當一男一女好愛嘅時候，就會咩都係好嘅，乜嘢都得嘅。但當真係面對現實環境嘅時候，思嘉真係跟咗漢華無錢無得生活嘅時候，大家都面對嗰樣問題嘅時候，現實出咗嚟係咪仲可以繼續落去呢？定係話「我愛你」三個字就可以生存落去呢？其實背後有呢一個問題帶出俾大家思考，所以漢華知唔知事實已經變咗唔係一個好重點嘅野。
3. 有一幕思嘉個好朋友，佢叫思嘉做女人而唔係佢個名，是否想藉此將說話講俾全部女人聽呢？
導演王嘉翊答：
其實「女人」呢一樣野我覺得係朋友之間一樣匿稱。
編劇鍾燕詩答：
即係其實我哋站在創作人立場嚟講，我哋就會睇嗰個角色究竟喺嗰個情景底下講乜野，我覺得佢哋兩個咁親密，咁就加一啲口頭禪嘅嘢去睇到佢地兩個真係好姊妹。如果觀眾閱讀到另一樣野，例如問題所講係咪講一啲女人嘅生存態狀之類，就要等觀眾自己去詮釋。
焦媛答：
其實思嘉呢個角色，佢係一個非常現代嘅女性，好敢愛敢恨，佢愛呢個男人咁佢真係覺得自己fall in love咗，咁佢就會好全心投入。但當發覺原來解決唔到問題嘅咁佢就會走，但如果你能夠從對白讀到一啲嘢出嚟，咁証明我地真係做到啲野。(笑)
4. 今次劇入面用啲歌係咪同電影版完全一樣？
導演王嘉翊答：
唔係，其實電影入面嘅歌只係用咗5首。而其他用嘅全部都係葛蘭姐姐嘅經典歌曲，或者其他由佢主唱嘅電影歌曲。
5. 小劉好鍾意思嘉又等咗佢5年，但點解到最後佢會俾個老闆咁對佢呢？
陳健豪答：
俗言有云「因愛成恨」，你越愛一個人，當佢唔鐘意你嘅時候呢，嗰個反應可以好極端。我自己覺得小劉得唔到思嘉，所以好恨要佢。自己得唔到所以要借助其他嘅力量令呢個女人日日喺佢身邊，等自己可以見到佢，咁佢就好開心。
6. 將電影野玫瑰放喺舞台上面，有冇加入新元素？
導演王嘉翊答：
如果有睇過電影版，天林叔喺鏡頭方面運用得好好，令到電影畫面好豐富。但如果每一個screen 都放上舞台，就會個劇變得好長，所以就要作出取捨。咁今次音樂劇，重點係點樣串埋所有嘢，咁某啲場次用咗歌詞去表達佢嘅意思。而所謂新元素就係加咗好多葛蘭其他歌入去，我自己覺得好開心，因為我本身好鍾意聽葛蘭嘅歌，而發現佢某啲歌曲好適合夾落呢個劇入面。同埋小劉呢個角色係豐富咗嘅，係幾個唔同嘅電影人物加埋變成一個人。
文：陳圓
沒有留言:
張貼留言